msdSalvegera 22’yemîn a Serhildana 12’ê Adara 2004’an li bajarê Qamişlo derbas dibe; Ev bûyera girîng xalek werçerxî di dîroka tevgera civakî û siyasî ya Sûriyeyê de nîşan da, ya ku bû kêliyeke diyarker di hişmendiya neteweyî de û di xeta têkoşîna Kurdan de ji bo rûmet û mafên wekhev di nava welatekî de ku cihê hemû zarokên xwe tê de hebe.
Di rojeke wiha de, bûyereke biêş di stadyûmek werzîşê de veguherî çirûskekê ku asta nerazîbûna kombûyî ya bi dehsalan a ji encama polîtîkayên cudakar û dûrxistinê yên li ser Kurdên Sûriyeyê, eşkere kir. Wê demê desthilatdariyê bi tundiyeke zêde rûbirûyî protestoyên gel ên aştiyane bû, ku di encamê de şehîd ketin, birîndar çêbûn û bi hezaran kes hatin girtin. Vê yekê birineke kûr di bîra kolektîf a Kurdên Sûriyê û di wijdanê neteweyî yê Sûriyeyê bi giştî de hişt.
Bîranîna vê serhildanê careke din tekez dike ku doza Kurd li Sûriyeyê ne dozeke dabeşbûyî an îzolekirî ye, lê belê beşekî resen e ji doza neteweyî ya Sûriyeyê ku bi avakirina dewleta hemwelatîbûn, dadgerî û yasayê ve girêdayî ye. Ew bûyer bûn nîşaneya wê yekê ku çareserkirina neheqiyên dîrokî û di serî de cudakariya li dijî Kurdan, şertekî bingehîn e ji bo her aramiya mayînde û ji bo her pêvajoyeke veguherîna demokratîk a rastîn di welat de.
Gelê Sûriyê bi giştî û Kurd bi taybetî, ji ber polîtîkayên çewisandin û înkara mafan berdêlên giran dan. Bandorên wê qonaxê hîn jî di jiyana gelek malbatên ku zarokên xwe winda kirine an rastî girtin û şopandinê hatine, amade ne. Lewma, pêkanîna dadgeriyê, qerebukirina qurbaniyan û hesabpirsîna ji berpirsên binpêkirinan, beşekî bingehîn e ji avakirina Sûriyeya pêşerojê û ji daxwazên her pêvajoyeke siyasî ya cidî ku li ser bingeha prensîbên dadmendiya veguhêz û serweriya yasayî hatibe avakirin.
Di ronahiya guherînên kûr ên ku Sûriye tê re derbas dibe, pêdivî bi nêzîkatiyeke neteweyî ya giştî heye ku kokên krîza Sûriyê bi hemû aliyên wê yên siyasî, civakî û neteweyî çareser bike. Çareseriya rastîn tenê bi rêya diyalogeke neteweyî ya berfireh pêkan e, ya ku pirrengiya neteweyî, çandî û olî ya li welat bipejrîne û pergaleke siyasî ya demokratîk û nenavendî ava bike ku beşdariya wekhev a hemû Sûriyeyiyan di birêvebirina karûbarên welatê xwe de mîsoger bike.
Her wiha ev salveger girîngiya xurtkirina yekrêziya navmala Kurdî li Sûriyeyê tîne bîra me, her wiha xurtkirina rola hêz û kesayetên Kurd di xebata neteweyî ya hevpar de. Ev yek dê bibe alîkar ji bo parastina mafên rewa yên Kurdan û di heman demê de hevparî û hevkariya neteweyî bi pêkhateyên din ên Sûriyê re xurt dike, da ku paşerojeke li ser bingehê jiyana hevbeş û rêzgirtina hevbeş ava bike.
Meclîsa Sûriya Demokratîk (MSD), dema vê salvegerê bibîr tîne, tekez dike ku riya ber bi Sûriyeyeke aram û dadmend ve, bi danpêdana pêkhateyên gelê Sûriyê, pejirandina diyaloga siyasî wekî rêya çareserkirina nakokiyan, û xebata hevpar ji bo avakirina dewleteke demokratîk û piralî re derbas dibe, ku maf û azadiyan ji bo hemû welatiyan bêyî cudakarî dabîn bike.
Bi vê boneyê, em bi serbilindî serê xwe li ber ruhê şehîdên Serhildana 12’ê Adarê û hemû qurbaniyên çewisandin û zordariyê li Sûriyê ditewînin. Bîranîna wan dê di wijdanê Sûriyeyiyan de her zindî bimîne û bibe motîvasyoneke nû ji bo berdewamkirina xebatê di welatekî ku tê de dadmendî, azadî û rûmet serdest be.
12’ê Adara 2026’an
Meclîsa Sûriyeya Demokratîk
